ނ. ލަންދޫގައި ދަޑުވެރިކަން މިހާރަށްވުރެ ތަރަށްޤީކުރެވިދާނެ އިންޑަސްޓްރީއެއް.
އަޅުގަނޑުމެންގެ ރަށަކީ މަސްވެރިކަމަށްވުރެ ބޮޑަށް ދަނޑުވެރި ރަށެއް ގޮތުގައި އިރެއްގައި ރާއްޖޭގައި މަޝްހޫރު ތަނެކެވެ. ވަކިން ޙާއްސަކޮށް އަތޮޅުގެ ނަމްބަރ ވަން އެވެ. އަޅުގަނޑުމެންގެ ދަނޑުވެރިންނަކީ މިކަމަށް ވަރަށް ކުޅަދާނަ ބައެކޭ ދެންނެވުމަކީ ގޯހަކަށް ނުވާނެއެވެ. ބައެއް ރޯދަމަހު ކާށިދޫ ފިޔަވާ އެންމެ ގިނައިން ދޮންކެޔޮ މާލޭން އުތުރުގައި އުފައްދާ ބަޔަކީ ލަންދޫގެ ދަނޑުވެރިންނޭ އަޅުގަނޑަށް ބުނެވިދާނެއެވެ.
އަދި، އެހެން ރަށްރަށުގައި އާއްމުކޮށް ނަހައްދާ ބައެއް ވައްތަރުތައް އަޅުގަނޑުމެންގެ ދަނޑުވެރިން ހައްދާތާ ދުވަސްތަކެއް ވެދާނެއެވެ. މީގެ ތެރޭގައި ކިއުކަމްބާރ އާއި ޗެރީ ކުއްޅަވައް ފަދަ ތަރުކާރީގެ ވައްތަރުތައް ހިމެނެއެވެ.
ދަނޑުވެރިކަމަށް ކުޅަދާނަ އަދި ހުނަރުވެރި ބައެއް އުޅޭ ތަނެއް ކަމުގައިވިޔަސް ވޭތުވެގެން ދިޔަ ތަނުގައި އަޅުގަނޑުމެންގެ ދަނޑުވެރިންނަށް އެމީހުން އެކުރާ މަސައްކަތުގެ އަގު ވަޒަން ކުރެވި، އަދި މި ދާއިރާގެ މަސައްކަތް ކުރިއަރުވައި ޕްރޮމޯޓް ކުރުމަށް އެކަށީގެންވާ އެއްބާރުލިބުން ލިބިފައި ނުވާކަން ފާހަގަ ކުރެވެއެވެ. ނަމަވެސް، ތަރައްޤީ ވާން އިންތިހާއަށް ވަކާލާތު ކުރާ ގިނަ މީހުން ތިބި އަޅުގަނޑުމެންގެ މިރަށުގައެވެ.
މިހާރުގެ ސަރުކާރުގެ ރޫޚް ހުރީ މި ދާއިރާ (ދަނޑުވެރިކަން) ކުރިއަށް ޖައްސާލުމެވެ. ދަނޑުވެރިކަން ކުރާ ގިނަ ބައެއްތިބި އަޅުގަނޑުމެންގެ ރަށުގައި ދަނޑުވެރިކަމުގެ ދާއިރާ ކުރިއެރުވުމަށްޓަކައި ރޭވިފައިވާ ޕްލޭންތަކަކީ ކޮބައިތޯ ވިސްނައި، މިކަން އެންމެ އެދެވޭ ގޮތެއްގައި ކުރެވޭ ގޮތްތައް ބަލަން ޖެހެއެވެ. މިކަން ކުރާ ފަރާތްތަކަށް ހިތްވަރު ދޭން ޖެހެއެވެ. ރަށުގެ ޕޮލިސީ މޭކަރުން މަސައްކަތް ކުރައްވާނަމަ ބޭނުންނުވިޔަސް ވިޔަސް މިހާރުގެ ސަރުކާރަށް މިކަމުގައި އަޅުގަނޑުމެންނަށް އެއްބާރުލުން ދޭން މަޖުބޫރުވާނެއެވެ.
މިގޮތުން އަޅުގަނޑުމެންގެ މިސިނާއަތު ހަރުދަނާ ކުރުމަށްޓަކައި ކުރެވިދާނެ ކަންތަށް ތަކުގެ ތެރޭގައި ރަށުގައި ދަނޑުވެރިކަން ކުރުމަށް އެކަށީގެންވާ ސަރަހައްދެއް އެކަށައަޅަން އެބަ ޖެހެއެވެ. މިގޮތުން މިހާރު ދަނޑުބިން ދޫކުރެވިފައިވާ ސަރަހައްދުތަށް އިތުރަށް ބޮޑު ކުރެވެން އޮތްނަމަ ބޮޑުކުރުން މުހިއްމެވެ. އަދި މި ސަރަހައްދަކީ، ސިނާއީ އެހެން ޕޮރްޖެކްޓްތައް ހެދުމަށް ފަހުންނަމަވެސް ބައި އަޅާލެވޭ ތާކަށް ވެގެން ނުވާނެއެވެ. މި ސަރަހައްދުން، ދަނޑުހައްދަން ބިން ދޫކުރާއިރު ވަކި ގޮތަކަށް ޕްލޭން ކޮށްގެން، ދޫކުރުން އެއީވެސް ކުރެވިދާނެ ކަމެކެވެ. އެގޮތުން، ކަރާ ހައްދަން ވަކި ވަރަކަށް ޖާގަ، މިރުސް ހައްދަން ވަކި ވަރަކަށް ޖާގަ، މިހެން ގޮސް އާއްމުކޮށް ބޭނުން ކުރާ ވީހާވެސް ގިނަ ވައްތަރުތަކެއް ހެއްދޭ ގޮތަށް ޖާގަ ދެވިދާނެއެވެ. މިހެން ހެދުމުން ރަށުން ލިބެން ހުންނަ ތަރުކާރީ އަދި މޭވާގެ ބާވަތްތައް އިތުރުވެގެން ދާނެކަމަށް ބެލެއެވެ.
މީގެ އިތުރުން، ޕޮލިސީ ލެވެލްގައި، ކުރެވިދާނެ ވަރަށް ރަނގަޅު މަސައްކަތެއް އެބަ އޮތެވެ. އެއީ ރަށުން ރަށަށް ބޭނުން ވާ މިންވަރަށް ތަރުކާރީ ހެއްދުމުގެ އަމާޒެވެ. މިގޮތަށް ވިސްނުން ބަހައްޓައިގެން މަސައްކަތް ކޮށްފިނަމަ މިއީ ހާސިލު ކުރެވޭނެ ލަޑުދަނޑިއެކެވެ. މިކަން ކުރެވިއްޖެނަމަ، މިއީ ރާއްޖޭގައިވެސް މިފަދަ ފުރަތަމަ ރަށަށް ވެގެންދާނެއެވެ. މިކަން ހާސިލު ކުރުމަށްޓަކައި ކުރެވިދާ މަސައްކަތްތަކުގެ ތެރޭގައި، މި ދާއިރާގެ ކެޕޭސިޓީ އިތުރު ކުރުމަށްޓަކައި، ބޭނުންވާ ތަމްރީނުދީ، ޒަމާނީ ޓެކްނޮލޮޖީ ތަޢާރަފްކޮށް، މުޑުވަކާއި، ބޭނުންވާ އާލާތް ފަސޭހައިން ހޯދޭނެ މަގު ތަނަވަސްކޮށް ދިނުން ހިމެނެއެވެ. އަދި އެންމެ އެދެވޭ ގޮތެއްގައި ދަނޑުވެރިކަން ކުރަމުން ދާ ފަރާތްތަކަށް ކޮންމެ އަހަރަކުވެސް ހިތްވަރު ދިނުމުގެ އެވޯޑެއްވެސް ދެވިދާނެއެވެ. މިއީ ނުކުރެވޭނެ ކަމެއްނޫނެވެ. ކުރެވިދާނެ ކަމެކެވެ. ކުރިން އަޅުގަނޑުމެން ވިސްނަމުން އައި ބޯދާ ގޮތްތަށް ދޫކޮށް އާގޮތަކަށް ވިސްނުން ބައްޓަން ކުރަންވި ވަގުތު މިވަނީ ޖެހިފައެވެ. ދަނޑުވެރިކަން ކުރި އެރުވުމަށްޓަކައި އަތުކުރި އޮޅާލަންވީ ވަގުތު އައިސް ޖެހިއްޖެއެވެ. ރަށު އޮފީހުގައި ތިބި އިސް ބޭފުޅުން މިފަދަ ކަންކަމާ މެދު ވިސްނަނާނެ ކަން އަޅުގަނޑަށް ހަމަ ޔަޤީނެވެ. އަޅުގަނޑުމެންނަށް ލިބިފައިވާ " މިފަޙްރު އަބަދުމެ މިގޮތުގައި ބޭއްވުމަށް ގަދައަޅާ މަސަތްކަތް ކުރަން ޖެހޭނެއެވެ.
0 ޚިޔާލު:
Post a Comment