އަންނަ މަހުން ފެށިގެން މީހުން ދިރިއުޅޭ ރަށްރަށުގައި ބަނގުރާ ވިއްކުން ހުއްދަކޮށް ޤަވާއިދު އާންމުކޮށްފި
.
މިނިސްޓްރީ އޮފް އިސްލާމިކް އެފެއާޒުންނާއި މަދަނީ ޖަމިއްޔާތަކާއި އާންމުންގެ ގިނަ ބަޔަކު ދެކޮޅުހަދަމުން ދަނިކޮށް، މީހުން ދިރިއުޅޭ ރަށްރަށުގައި ބަނގުރާ ވިއްކުމުގެ ހުއްދަ އަންނަ މަހުގެ ފުރަތަމަ ދުވަހުން ފެށިގެން ދޭ ގޮތަށް މިނިސްޓްރީ އޮފް އިކޮނޮމިކް ޑިވެލޮޕްމަންޓް އިން ނިންމައި އެކަން އިއުލާންކޮށްފި އެވެ.
.
މިއަދު އެ މިނިސްޓްރީގެ ވެބްސައިޓުގައި ޝާއިއުކުރި މި ގަވާއިދު އެންމެ ފުރަތަމަ ނެރުނީ ހުސްވި އަހަރުގެ ނޮވެމްބަރު 9ގަ އެވެ. ނަމަވެސް ގިނަ ބައެއްގެ ފާޑުކިޔުންތައް ރައްދުވާން ފެށުމުން، ނޮވެމްބަރު 14، 2009 ގައި އެ ގަވާއިދު ވެބްސައިޓުން ނަގައި އެއަށް އަމަލުކުރުން ފަސްކުރީ، ގަވާއިދަށް ގެންނަންޖެހޭ އިސްލާހުތަކެއް ހުރިކަމަށް ބުނެ އެވެ. އެ ފަހަރު މި ގަވާއިދަށް އަމަލުކުރާން ނިންމާފައި އޮތީ ނޮވެމްބަރު 15، 2009 ން ފެށިގެންނެވެ.
.
ޤަވާއިދު ބުނާ ގޮތުން، މީހުން ދިރިއުޅޭ ރަށްރަށުގައި ޓޫރިޒަމް މިނިސްޓްރީން ގަބޫލުކުރާ ފެންވަރަށް ހަދައި އެ މިނިސްޓްރީގައި ރަޖިސްޓްރީކޮށްފައިވާ ހޮޓާތަކުގެ ތެރެއިން މަދުވެގެން 100 އެނދުގެ ހޮޓާތަކުގައި ހިންގާ ބާތަކުގައި ބަނގުރާ ވިއްކޭނެ އެވެ.
.
މި ޤަވާއިދުގެ ދަށުން ބައިނަލްއަގްވާމީ އެއާޕޯޓުތަކުގެ ޑިޕާޗާ ޓާމިނަލްގައި ޓޫރިޒަމް މިނިސްޓްރީން ގަބޫލުކުރާ ފެންވަރަށް ހަދައި އެ މިނިސްޓްރީގައި ރަޖިސްޓްރީކުރާ ބާތަކަށާއި ޓޫރިޒަމް މިނިސްޓްރީގައި ރަޖިސްޓްރީކޮށްފައިވާ ޕިކްނިކް އައިލެންޑްތަކާއި ޔޮޓްމެރީނާތަކުގައި ވެސް ބަނގުރާ ވިއްކުމުގެ ހުއްދަ ދެއެވެ.
.