ދުނިޔެއަށް މަޝްހޫރު ދީނީ އިލްމުވެރިޔާ ޒާކިރު ނައިކް މިމަހު ރާއްޖެ ވަޑައިގަންނަވާނެ
ދުނިޔެއަށް އެންމެ މަޝްހޫރު ދީނީ އިލްމުވެރިންގެތެރޭގައި ހިމެނިވަޑައިގަންނަވާ، ޕީސް ޓީވީ އިން އަޅުގަނޑުމެންނާއި “އެންމެ ރައްޓެހި، އެންމެ މަޤްބޫލް” ފަޟީލަތުއްޝައިޚު ޒާކިރު ނައިކް އާއި އޭނާގެ ޢާއިލާ ރާއްޖެ ވަޑައިގަތުމަށް ހަމަޖެހިއްޖެއެވެ.
މިއަދުނޫހުން ކުރި ސުވާލަކަށް ޖަވާބުދެއްވަމުން މިނިސްޓްރީ އޮފް އިސްލާމިކް އެފެއަރޒްގެ ނާއިބު އައްޝައިޚު މުޙައްމަދު ފަރޫޤް ވިދާޅުވީ ފަޟީލަތުއްޝައިޚު ޒާކިރު ނައިކް ރާއްޖެވަޑައިގަތުމަށް އެމިނިސްޓްރީ އިން ދެއްވާފައިވާ ދައުވަތު ޤަބޫލުފުޅުކުރައްވައި މިމަހު 28 އާއި 30 އާއި ދެމެދު ރާއްޖެވަޑައިގެން ދެއްވާނެކަމުގެ ޔަޤީންކަން ދެއްވައިފިކަށެވެ.
” ޒާކިރު ނައިކް ވަޑައިގަންނަވާނީ އެބޭފުޅާގެ ޢާއިލާއާއިވެސް އެކުގައި. ޒާކިރު ނައިކް ތަޤްރީރު ކުރެއްވުމުގެ އިތުރުން އަނބިކަނބަލުން އަންހެނުންނަށް ޚާއްޞަ ތަޤްރީރެއް ދެއްވާނެ. އަދި ދަރިކަލުންވެސް ތަޤްރީރު ކުރައްވާނެ.” ކަމަށް ޝައިޚު ފާރޫޤް ވިދާޅުވިއެވެ.
މިދަރުސްތަކަށްފަހު ބައިވެރިން ކުރަން ބޭނުން ސުވާލުކުރުމުގެ ފުރުޞަތު ދެއްވާނެކަމަށްވެސް ޝައިޚު ފާރޫޤް ވިދާޅުވިއެވެ.
ޒާކިރު ނައިކް އަކީ ހިލޭ ސާބަހަށް ހިންގާ މަދަނީ ޖަމިއްޔާއެއް ކަމަށްވާ އިސްލާމިކް ރިސާރޗް ފައުންޑޭޝަންގެ ފައުންޑަރ އަދި ޕްރެޒިޑެންޓް އެވެ. އިސްލާމް ދީނުގެ ހިދާޔަތު ފެތުރުމުގައި އެންމެ ފުރިހަމަކަމާއިއެކު މަސައްކަތްކުރަމުންގެންދާ މުމްބާއީގެ ޓީވީ ޗެނެލެއްކަމަށްވާ ޕީސް ޓީވީ ޗެނެލަކީ އެ ޖަމާއަތުން ހިންގާ ޗެނެލެކެވެ. މި ޗެނެލްގެ އެންމެ މަޤބޫލު ޕްރެޒެންޓަރގެ އިތުރުން ޒާކިރް ނައިކް އަކީ އެންމެ ގިނަ ތަޤްރީރުކުރައްވާ ޢިލްމުވެރިޔާއެވެ.
ފަޟީލަތުއްޝައިޚު ޒާކިރު ނައިކްއަކީ މިވަގުތު ދުނިޔޭގައި ތިއްބެވި ދީނީ އިލްމުވެރިންގެތެރެއިން އެންމެ ގިނަ ބައެއްގެ މަޤްބޫލުކަން އެންމެ ބޮޑަށް ލިބިވަޑައިގެންފައިވާ އިލްމުވެރިޔާކަމަށް ގިނަބަޔަކު ޤަބޫލުކުރެއެވެ.
ފަޟީލަތުއްޝައިޚު ޒާކިރު ނައިކް ރާއްޖެ ގެންނެވުމުގެ މަސައްކަތަކީ މިދިއަ އަހަރުންފެށިގެން މިނިސްޓްރީ އޮފް އިސްލާމިކް އެފެއަރޒް އިން ކުރައްވަމުންގެންދަވާ މަސައްކަތްތަކެކެވެ. ހަތަރު ހަރަމްފުޅުގެ އިމާމުން ރާއްޖެގެންނެވުމުގެ މަސައްކަތްވެސް އެމިނިސްޓްރީ އިން ގެންދަވަނީ ކުރައްވަމުންނެވެ.
0 ޚިޔާލު:
Post a Comment